ممكن تشوف الرسالة هذي واقراهـا .. وابيـك
تعتــرف لي من كتبها؟ إنـت ولاّ شخـص ثانـي
فيها مكتوب (اعشقك واشتاقلـك وامـوت فيـك
واوعــدك إنـّا نـعيـش لبعـض باخــلاص وتـفـانـي
وانّ مهما طال فيني الوقت .. اعينـك واعتنيـك
ومستحيل اجرح شعورك يـوم أو منّـي تعانـي
وانّ حتى لـو تخلّـوا عنْـك لحظـه .. والديـك
مستـعــدّ اعـوّضـك يـاكـل كلـي مـن حنــانـي
وانّ هــذا القلـب منْــك اوّلـه وآخــرتـه إليـك
فاعرف انّي لجل حبّك بعت كل اللـي شرانـي)
شفت هالأربع سطـور اللـي قريـت بناظريـك
هذي فحوى من رسالـه إنـت كاتبهـا عشانـي
إحتفظت بْهـا زمـان وقلـت: بمْسكهـا عليـك
لجــل ادينـك لـو تغيّـر هالـكـلام الأولانــي
أذكر انّـك قلـت لـي فـي وقتهـا: الله يهديـك
يعني معقول اتغيّـر وانـت قطعـه مـن كيانـي
لا تــوسـوس واحتوينـي كثـر مانـي محتويـك
واترك الأقـدار تثبـت صـدق ماقالـه لسانـي
قلت: ماهيب وسوسـه..والـود ودي ألتقيـك
أربع وعشرين ساعــه معـك مـا أبــرح مكانـي
بس اخاف انّي بدَل ما اشكي لك الجرح .. اشتكيك
وانت خـابــر وش يسوّي الجـرح في وسط المحـاني
قلت لي: لا لا .. تطمّن .. ليش خوفـك يعتريـك
خـلّ خـوفـك من جميـع الـنــاس وارقـد فـي أمـانــي
ومرت الأيام واحْنا بيـن هـذي .. وبيـن ذيـك
إتصالات .. ولقاءات .. ومراسيـل .. وأغانـي
لين غبْـت بْـلا سبايـب واستمريـت احتريـك
وعشت وهم اعانقك في كل لحظـه مـن زمانـي
صرت اشوفك والْمسَك من دون حتى مـا أجيـك
كلما طالعت لألبـــوم الصــــور .. بضعـة ثــوانـي
واشعر بإحسـاس يذبـح جِـد .. لكنّـه يُريـك
إنّ أيّة شيء مهما طال .. يبقـى شـيء فانـي
مثل حبك .. قادنـي لمواجـه المـوت الوشيـك
واكتشـفـت انـّه ســراب وحلـم ضيّــع عنفوانـي
فْليتني فيما مضى من عمر .. ماكنـت ارتجيـك
وليتني ماكنت احبّ بصدق.. وانّي "دنجوانـي"
إبتليـت بعشقـك .. الله ميـر جعلـه يبتلـيـك
وانت ماقـدّرت حتـى تضحياتـي .. يـا أنانـي
شفت لك شوفه جديده وصار لك غيري .. شريك
وافتـرقـنـا .. وصرت انا مجني عليـه وإنت جانـي
إنصدمت وقمت اعيد الذاكـره .. واقـرا حكِيـك
واسأل حروف الرساله عنْك .. معقوله نسانـي؟
قالت: اللي كـان يكتبنـي ورمانـي فـي يديـك
قبلها في يدين غيرك .. كـان كاتبنـي ورمانـي
هذا واحد .. باع غيـرك لجـل يقـدر يشتريـك
مثل ما هالحين باعك لجل يشري شخـص ثانـي
من اختياري
` الـ ج ــوري`
{ الـرســالــهـ ..!! 
